ಪ್ರತಿಲಿಪಿ ಮೂಲಕ ಬೆಳಕಿಗೆ ಬಂದ ಸಾಹಿತಿ ಮೇಘನಾ ಕಾನೇಟ್ಕರ್‌ ಅವರು “ಲೈಫ್‌ನಲ್ಲೊಂದು ಯೂ ಟರ್ನ್ – ದೇಶ ಕಾಲದ ಗಡಿ ಮೀರಿದ ಕತೆಗಳು” ಎಂಬ ಕಥಾಸಂಕಲನವನ್ನು ಹೊರತಂದಿದ್ದಾರೆ. ಅವರಿಗೆ ಅಭಿನಂದನೆಗಳು.
ಮೇಘನಾ ಅವರು ಈ ಸಂಕಲನದಲ್ಲಿ
ಹದಿನೈದು ಕತೆಗಳನ್ನು ಓದುಗರಿಗೆ ನೀಡಿದ್ದು, ಈ ಸಂಕಲನವನ್ನು “ಕಳೆದುಕೊಂಡಿದ್ದ ನನ್ನನ್ನು ಕಂಡುಕೊಳ್ಳುವಂತೆ
ಮಾಡಿದ ಆ ʼಅವನಿಗೆʼ” ಅರ್ಪಿಸಿದ್ದಾರೆ. ಸಂಕಲನಕ್ಕೆ ಮುನ್ನುಡಿಯಿಲ್ಲ, ಕತೆಗಾರ್ತಿಯೇ ತಮ್ಮ ಕತೆಗಳ
ಬಗ್ಗೆ ತಮ್ಮ ಮಾತುಗಳಲ್ಲಿ ಹೇಳಿದ್ದಾರೆ. ಸಂಕಲನದ ಅಂತ್ಯದಲ್ಲಿ ಆಪ್ತರ ಅನಿಸಿಕೆಗಳಿವೆ. ಕಾದಂಬರಿಕಾರ
ಮತ್ತು ಅಂಕಣಕಾರ ಸಂತೋಷಕುಮಾರ ಮೆಹೆಂದಳೆ ಅವರ ʼಸಂಕೀರ್ಣ ಭಾವ ಕಥನಕೋಶ…ʼ ಎಂಬ ಬೆನ್ನುಡಿಯಿದೆ.
ಸಂಕಲನದ ಶೀರ್ಷಿಕೆಯ ಕತೆ ʼಲೈಫ್‌ನಲ್ಲೊಂದು
ಯೂ ಟರ್ನ್ʼ ಒಂದು ಜೀವನಪ್ರೀತಿಯ ಕತೆಯಾಗಿದ್ದು, ಈ ಭಾವದಲ್ಲೇ ಇನ್ನಿತರ ಕತೆಗಳನ್ನು ಓದಬಹುದಾಗಿದೆ.
ಇದೊಂದು ಪುಟ್ಟ ಸರಳ ಕತೆಯಾಗಿದ್ದು ಈ ಕತೆಯ ನಾಯಕಿ ಸಿಂಚನಾ ಒಂಟಿ ಬದುಕನ್ನು ಕಟ್ಟಿಕೊಳ್ಳಲು ಪ್ರಯಾಣ
ಆರಂಭಿಸಿ ಮಾರ್ಗಮಧ್ಯೆ ಸುಧನ್ವನ ಪರಿಚಯವಾಗಿ ಆಕೆಯ ಬದುಕಲ್ಲಿ ಸಿಗುವ ತಿರುವು ಈ ಕಥೆಯ ಜೀವಾಳ. ʼಬಾಡಿ
ಹೋದ ಬಳ್ಳಿಯಿಂದ ಹೂವು ಅರಳಬಲ್ಲದೇ…ʼ ಹಾಡನ್ನು ಈ ಕತೆಯಲ್ಲಿ ಬಳಸಿಕೊಳ್ಳುವುದರ ಜೊತೆಯೇ ಇತ್ತೀಚಿಗೆ
ಟ್ರೆಂಡ್‌ ಆದ ʼಏನಿಲ್ಲ ಏನಿಲ್ಲ ನನ್ನ ನಿನ್ನ ನಡುವೆ ಏನಿಲ್ಲʼ ಹಾಡು ಕೂಡ ಉಲ್ಲೇಖಿಸಿ ಅಂತ್ಯದಲ್ಲಿ
ʼನಿನ್ನ ಜೊತೆ ನನ್ನ ಕತೆ ಒಂದೊಂದು ಸಾಲು ಜೀವಿಸಿದೆ… ನನ್ನ ಜೊತೆ ನಿನ್ನ ಕತೆ ಬೇರೊಂದು ಲೋಕ ಸೃಷ್ಟಿಸಿದೆ…ʼ
ಹಾಡನ್ನು ಕೂಡ ಸೇರಿಸಿದ್ದಾರೆ. ಈ ಮೂರು ಹಾಡುಗಳನ್ನು ಕತೆಯ ಓಘಕ್ಕೆ ತಕ್ಕಂತೆ ಬಳಸಿರುವುದು ಕತೆಗಾರ್ತಿಯ
ಜಾಣ್ಮೆ. ಕತೆಯ ಅಂತ್ಯ ಜೀವನಪ್ರೀತಿಯ ಪ್ರತೀಕವಾಗಿದ್ದು, ಈ ನಿಟ್ಟಿನಲ್ಲಿಯೇ ಸಂಕಲನದ ಇತರೆ ಕತೆಗಳನ್ನು
ಓದಬಹುದಾಗಿದೆ.
ಈ ಸಂಕಲನವನ್ನು ಹರಿವು ಬುಕ್ಸ್‌
ಪ್ರಕಟಿಸಿದ್ದು ಸಂಕಲನದ ಮೌಲ್ಯ ರೂ. 150/-
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ