ಡಾ|| ರಾಜಕುಮಾರ್‌ರವರ ವೃತ್ತಿಪರತೆ

 ಡಾ|| ರಾಜಕುಮಾರ್‌ರವರ ವೃತ್ತಿಪರತೆ

“ಡಾ|| ರಾಜಕುಮಾರ್‌ರವರನ್ನು ನಾನು ‘ಬಂಗಾರದ ಮನುಷ್ಯ’

      ಎನ್ನುವ ಬದಲು ‘ಬೆವರಿನ ಮನುಷ್ಯ’ ಎನ್ನುತ್ತೇನೆ” 

– ಡಾ|| ಬರಗೂರು ರಾಮಚಂದ್ರಪ್ಪ.

ನಾವು ಯಾವುದೇ ಕೆಲಸ ಮಾಡಿದರೂ, ಅದು ಹೊಟ್ಟೆಪಾಡಿಗಿರಲಿ ಅಥವಾ ಹವ್ಯಾಸವಾಗಿರಲಿ ಆ ಕೆಲಸದಲ್ಲಿ ತಲ್ಲೀನರಾಗಬೇಕು. ತಲ್ಲೀನತೆಯೆಂದರೆ ನಮ್ಮ ತನು ಮತ್ತು ಮನವನ್ನು ನಾವು ಮಾಡುವ ಕೆಲಸದಲ್ಲೇ ತೊಡಗಿಸಿಕೊಳ್ಳುವುದು. ಅಂದರೆ, ನಾವು ಮಾಡುವ ಕೆಲಸದಲ್ಲಿ ವೃತ್ತಿಪರರಾಗಿರುವುದು. ನೀವು ಕೆಲಸವೆನ್ನಿರಿ, ವೃತ್ತಿಯೆನ್ನಿರಿ ಅಥವಾ ಕಸುಬು ಎನ್ನಿರಿ ಅದರಲ್ಲಿ ಪ್ರೊಫೆಷನಲ್ ಆಗುವುದು. ಜೊತೆಗೆ ನಮ್ಮ ಕಸುಬುದಾರಿಕೆಯನ್ನು ತೋರಿಸುವುದು ತುಂಬಾ ಮುಖ್ಯ. ನೀವು ಕೇಳಿರಬಹುದು, “ಏ... ಅವನು ತುಂಬಾ ಪ್ರೊಫೆಷನಲ್” ಎಂದು ಮಾತನಾಡುವುದನ್ನು. ಆ ಪ್ರೊಫೆಷನಲ್ಲಿಸಂ ಕುರಿತೇ ನಾನಿಲ್ಲಿ ಹೇಳ ಹೊರಟಿರುವುದು.‌

ನೀವು ನಿಮ್ಮ ಪುಸ್ತಕವನ್ನು ಪ್ರೊಫೆಷನಲ್‌ ಆಗಿ ಪ್ರಕಟಿಸಬೇಕೆ?

ನನಗೆ ಪ್ರೊಫೆಷನಲಿಸಂ ಅಥವಾ ವೃತ್ತಿಪರತೆಯೆಂದರೆ ಯಾವಾಗಲು ನೆನಪಿಗೆ ಬರುವುದು ಡಾ|| ರಾಜಕುಮಾರ್! ಹೌದು, ಕನ್ನಡ ಚಿತ್ರರಂಗದ ನಟಸಾರ್ವಭೌಮ ರಾಜಣ್ಣ. ಮೂರನೇ ತರಗತಿಯನ್ನೂ ಮುಗಿಸದ ಬಾಲಕನೊಬ್ಬ ತನ್ನ ಕಲೆಯಿಂದಲೇ ದಂತಕತೆಯಾಗುವಷ್ಟು ಬೆಳೆದು ಬಿಡುತ್ತಾನೆಂದರೆ ಅದು ಒಂದು ಆಶ್ಚರ್ಯದ ಸಂಗತಿಯೇ ಸರಿ. ಇದಕ್ಕೆ ಕಾರಣ ಆ ಬಾಲಕ ತನ್ನ ಕಲೆಯನ್ನು, ಪ್ರತಿಭೆಯನ್ನು ತನ್ನ ವೃತ್ತಿ, ತನ್ನ ಹೊಟ್ಟೆಪಾಡು ಎಂದು ಭಾವಿಸಿ ಆ ಕೆಲಸದಲ್ಲೇ ತನ್ನ ಜೀವಮಾನವನ್ನೇ ತೊಡಗಿಸಿಕೊಂಡದ್ದರ ಫಲ. ಮೊದಲಿಗೆ ರಂಗಭೂಮಿ, ನಂತರ ಚಲನಚಿತ್ರ, ಆ ನಂತರ ಗಾಯಕನಾಗಿ, ಡಾ|| ರಾಜಕುಮಾರ್ ಅನಭಿಷಕ್ತ ದೊರೆಯಾದರೆೆಂದರೆ ಅದಕ್ಕೆ ಕಾರಣ ಅವರು ತಮ್ಮ ಕೆಲಸದಲ್ಲಿ ತೋರಿದ ವೃತ್ತಿಪರತೆ. 

ಅದು ‘ಮಂತ್ರಾಲಯ ಮಹಾತ್ಮೆ’ ಚಿತ್ರಕ್ಕೆ ಡಾ|| ರಾಜಕುಮಾರ್‌ರವರನ್ನು ರಾಘವೇಂದ್ರ ಸ್ವಾಮಿಯ ಪಾತ್ರ ಮಾಡಲು ಆಯ್ಕೆ ಮಾಡಿದ ಸಂದರ್ಭ. ಕೆಲವರು ಇವರನ್ನು ರಾಘವೇಂದ್ರ ಸ್ವಾಮಿಯ ಪಾತ್ರ ಮಾಡಲು ಆಯ್ಕೆಮಾಡಿದಕ್ಕೆ ಬೇಸರಗೊಂಡು ಇವರ ಅರ್ಹತೆಯನ್ನು ಪ್ರಶ್ನಿಸಿ ಟೀಕಿಸುತ್ತಾರೆ. ಆಗ ರಾಜಕುಮಾರ್ ತಮ್ಮ ಪ್ರತಿಭೆಯಿಂದಲೇ ಅವರಿಗೆಲ್ಲಾ ಉತ್ತರ ಕೊಡುತ್ತಾರೆ. ಚಿತ್ರದ ಆರಂಭ ಕಾಲದಿಂದಲೂ ಮುಗಿಯುವವರೆಗೂ ತಮ್ಮ ಇಷ್ಟದ ಮಾಂಸಾಹಾರವನ್ನು ತ್ಯಜಿಸುತ್ತಾರೆ. ಕಾಲಿಗೆ ಚಪ್ಪಲಿ ಹಾಕುವುದನ್ನು ಬಿಡುತ್ತಾರೆ. ಆಗಾಗ ಉಪವಾಸಗಳನ್ನೂ ಕೈಗೊಳ್ಳುತ್ತಾರೆ. ತಾವು ರಾಘವೇಂದ್ರ ಸ್ವಾಮಿಯಾಗಿ ಅಭಿನಯಿಸುವಾಗಲೂ ರಾಘವೇಂದ್ರ ಸ್ವಾಮಿಯವರಂತೆಯೇ ಜೀವನಶೈಲಿಯನ್ನು ಮೈಗೂಡಿಸಿಕೊಂಡು ತಮ್ಮ ವೃತ್ತಿಪರತೆಯನ್ನು ಮೆರೆಯುತ್ತಾರೆ. ಚಲನಚಿತ್ರ ಮುಗಿದು ಬಿಡುಗಡೆಯಾಗಿ ಭಕ್ತರು ರಾಘವೇಂದ್ರಸ್ವಾಮಿಗಳನ್ನು ಡಾ|| ರಾಜಕುಮಾರ್‌ರವರಲ್ಲೇ ಕಂಡುಕೊಳ್ಳುವಷ್ಟು ದಂತಕತೆಯಾಗಿಬಿಡುತ್ತಾರೆ.

ಮತ್ತೊಂದು ಉದಾಹರಣೆ ನೀಡಬಹುದಾದರೆ, ಅದು ಎಚ್ಚೆಮ್ಮ ನಾಯಕ ನಾಟಕದಲ್ಲಿ ಡಾ|| ರಾಜಕುಮಾರ್ ಎಚ್ಚೆಮ್ಮ ನಾಯಕನಾಗಿ ಅಭಿನಯಿಸುವ ಸಂದರ್ಭ. ರೌದ್ರರಸ ಮುಖ್ಯವಾಗಿದ್ದ ಆ ಪಾತ್ರ ರಂಗವನ್ನು ಪ್ರವೇಶಿಸುವುದು ಮಧ್ಯರಾತ್ರಿಯ ಹೊತ್ತಿಗೆ. ಆಗ ಡಾ|| ರಾಜ್‌ರವರಿಗೆ ಮೇಕಪ್ ಮ್ಯಾನ್ ಆಗಿದ್ದವರು ಸುಬ್ಬಣ್ಣ ಎನ್ನುವರು. ಅಂದು ಸುಬ್ಬಣ್ಣನವರ ಮಗ ಕೇಶವ ಎನ್ನುವವರು ಮೇಕಪ್ ಮಾಡಲು ಹೋಗಿರುತ್ತಾರೆ. ಎಲ್ಲರೂ ಮೇಕಪ್ ಮುಗಿಸಿಕೊಂಡು ತಮ್ಮ ಸರದಿಗೆ ಕಾಯುವಂತೆ ರಾಜಣ್ಣನವರೂ ಸಜ್ಜಾಗಿ ಕುಳಿತ್ತಿದ್ದರು. ಫೈನಲ್ ಟಚ್ ಅಂದರೆ ಕಡೆಯ ಕ್ಷಣದಲ್ಲಿ ಮೀಸೆ ಅಂಟಿಸಿಕೊಂಡು ರಂಗ ಪ್ರವೇಶ ಮಾಡುವುದು ಮಾತ್ರ ಬಾಕಿ ಉಳಿದಿತ್ತು. ಸಾಮಾನ್ಯವಾಗಿ ಮೀಸೆಗೆ ಗೋಂದು ಅಂಟಿಸಿ ಅವರ ಕೈಗೆ ಕೊಟ್ಟು ಕನ್ನಡಿ ಹಿಡಿದರೆ ಅದನ್ನು ಸರಿಯಾಗಿ ಅಂಟಿಸಿಕೊಂಡು ಕನ್ನಡಿಯಲ್ಲಿ ನೋಡಿ ಡಾ|| ರಾಜ್ ರಂಗಪ್ರವೇಶ ಮಾಡುತ್ತಿದ್ದರು. ಆ ಕೆಲಸವನ್ನು ಯಾವಾಗಲು ಪಾರ್ವತಮ್ಮನವರು ಮಾಡುತ್ತಿದ್ದರಂತೆ. ಅಂದು ಕೇಶವರು ತಾವೇ ಆ ಕೆಲಸವನ್ನು ಮಾಡುವುದಾಗಿ ಹೇಳಿ, ಪಾರ್ವತಮ್ಮನವರು ಬೇಡವೆಂದರೂ ಹೋದರಂತೆ. ಸರಿ, ರಾಜಣ್ಣನವರಿಗೆ ಮೀಸೆ ಕೊಟ್ಟು ಕನ್ನಡಿ ಹಿಡಿದರು. ಸರಿಯಾಗಿ ಮೀಸೆ ಅಂಟಿಸಿಕೊಂಡ ರಾಜಣ್ಣ ಅತ್ತ ರಂಗಪ್ರವೇಶ ಮಾಡಿದರೆ, ಇತ್ತ ಕನ್ನಡಿ ಹಿಡಿದ ಕೇಶವರು ಡಾ|| ರಾಜ್‌ರವರ ಮುಖದಲ್ಲಿದ್ದ ರೌದ್ರರಸವನ್ನು ನೋಡಿ ಹೆದರಿಕೊಂಡು ಕೈಯಲ್ಲಿದ್ದ ಕನ್ನಡಿ ಕೆಳಗೆ ಬೀಳಿಸಿದರಂತೆ. ಗ್ರೀನ್ ರೂಂನಲ್ಲಿದ್ದವರು ಓಡಿಬಂದು ನೋಡಿದರೆ ಕೇಶವರು ನಡುಗುತ್ತಾ ನಿಂತಿದ್ದರಂತೆ! ಸಮಾಧಾನ ಮಾಡಿ ಕಾರಣ ಕೇಳಿದರೆ, ಇನ್ನೆಂದೂ ತಾನು ಅಣ್ಣಾವ್ರಿಗೆ ಮೀಸೆ ಕೊಡುವುದಿಲ್ಲವೆಂದು ತೊದಲಿದರಂತೆ. ಇದು ಡಾ|| ರಾಜ್‌ರ ತಲ್ಲೀನತೆ. ರಂಗಪ್ರವೇಶಕ್ಕೂ ಮುನ್ನ ತಾನು ಅಭಿನಯಿಸುತ್ತಿರುವ ಪಾತ್ರವನ್ನು ಆವಾಹಿಸಿಕೊಂಡು ತಾನೇ ಪಾತ್ರವಾಗಿ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಗಿ ಜನಮಾನಸದಲ್ಲಿ ಚಿರಂಜೀವಿಯಾದ ಡಾ|| ರಾಜಕುಮಾರ್‌ರ ವೃತ್ತಿಪರತೆ.

ಅಮೇಜಾನ್‌ ಶಾಪಿಂಗ್‌ ಮಾಡಲು...

ನಾಯಕನಾಗಿ ಅಭಿನಯಿಸಿದ ಮೊದಲ ಚಿತ್ರ ಬೇಡರಕಣ್ಣಪ್ಪನಿಂದ ಹಿಡಿದು ಕೊನೆಯ ಚಿತ್ರ ಶಬ್ದವೇಧಿಯವರೆಗೆ ಕನ್ನಡ ಚಲನಚಿತ್ರ ರಂಗದಲ್ಲಿ ತಮ್ಮ ವೃತ್ತಿಪರತೆಯಿಂದ ಮೇರುನಟರಾದ ಡಾ|| ರಾಜಕುಮಾರ್‌ರವರ ವೃತ್ತಿಪರತೆಯನ್ನು ನಾವೂ ಮೈಗೂಡಿಸಿಕೊಂಡರೆ ನಮ್ಮ ವೃತ್ತಿಯಲ್ಲೂ ಸಾಧನೆ ಮಾಡಬಹುದಾಗಿದೆ. 

ನಮ್ಮ ದೇಶದ ವ್ಯೋಮ ವಿಜ್ಞಾನದ ಪಿತಾಮಹ ವಿಕ್ರಂ ಸಾರಾಭಾಯಿ ಹೇಳಿದ, ‘ಗದ್ದಲದ ನಡುವೆಯೂ ಸಂಗೀತವನ್ನು ಆಲಿಸುವಾತ ಮಹತ್ವವಾದದ್ದನ್ನು ಸಾಧಿಸಬಲ್ಲ’ ಎಂಬ ಮಾತುಗಳಂತೆ ನಮ್ಮ ಸುತ್ತ ಯಾವುದೇ ಗದ್ದಲವಿರಲಿ ಅಥವಾ ಆಕರ್ಷಣೆಯಿರಲಿ ನಾವು ನಮ್ಮ ಕೆಲಸದತ್ತ ಮಾತ್ರ ಗಮನ ಕೊಟ್ಟರೆ ಯಶಸ್ಸು ನಮ್ಮದಾಗುವುದರಲ್ಲಿ ಎಳ್ಳಷ್ಟೂ ಸಂಶಯವಿಲ್ಲ.

- ಗುಬ್ಬಚ್ಚಿ ಸತೀಶ್

***

ಗೋಮಿನಿ ಪ್ರಕಾಶನದಲ್ಲಿ ಪುಸ್ತಕ ಪ್ರಕಟವಾಗಲು ಪ್ರಮುಖ ನಿಬಂಧನೆಗಳು

ಗೋಮಿನಿ ಪ್ರಕಾಶನದಲ್ಲಿ ಪುಸ್ತಕ ಪ್ರಕಟವಾಗಲು ಪ್ರಮುಖ ನಿಬಂಧನೆಗಳು

1. ಪ್ರಕಾಶನವು ಆಧುನಿಕ ತಂತ್ರಜ್ಞಾನವನ್ನು ಅಳವಡಿಸಿಕೊಂಡಿರುವುದರಿಂದ ಮೊದಲಿಗೆ ನೂರು ಪ್ರತಿಗಳನ್ನು ಮಾತ್ರ ಮುದ್ರಿಸಲಾಗುತ್ತದೆ. ಸಾಹಿತಿಗಳಿಗೆ 25 ಗೌರವಪ್ರತಿಗಳನ್ನು ನೀಡಲಾಗುತ್ತದೆ. ಯಾವುದೇ ರೀತಿಯ ಗೌರವಸಂಭಾವನೆ ಇರುವುದಿಲ್ಲ.

2. ನೂರಕ್ಕೂ ಹೆಚ್ಚು ಪ್ರತಿಗಳನ್ನು ಮಾರುಕಟ್ಟೆಯ ಬೇಡಿಕೆಗೆ ತಕ್ಕಂತೆ ಮುದ್ರಿಸಲಾಗುತ್ತದೆ. ಪುಸ್ತಕಗಳನ್ನು ಪ್ರಮುಖವಾಗಿ ಪ್ರಕಾಶನದ ನೆಟ್ವರ್ಕ್ ಮೂಲಕ ಮಾರಾಟ ಮಾಡಲಾಗುತ್ತದೆ.

3. ಪುಸ್ತಕದ ಬೌದ್ಧಿಕ ಹಕ್ಕು ಸಾಹಿತಿಗಳದ್ದಾಗಿದ್ದು, ಪುಸ್ತಕದ ಭೌತಿಕ ಹಕ್ಕು ಪ್ರಕಾಶಕರದ್ದಾಗಿರುತ್ತದೆ. ಸರ್ಕಾರಿ ಮತ್ತು ಖಾಸಗಿ ಮಾರಾಟವನ್ನು ಪ್ರಕಾಶಕರು ಮಾತ್ರ ಮಾರಾಟಮಾಡಲು ಅರ್ಹರಾಗಿರುತ್ತಾರೆ. ಪ್ರಕಾಶಕರು ಸಾರ್ವಜನಿಕ ಗ್ರಂಥಾಲಯ ಇಲಾಖೆಯಲ್ಲಿ ಈ ಸಾಹಿತಿಯ ಈ ಪುಸ್ತಕದ ಮಾರಾಟದ ಹಕ್ಕು ತಮ್ಮದೇ ಎಂದು ನೋಂದಾಯಿಸಲು ಅರ್ಹರಾಗಿರುತ್ತಾರೆ. ಕೃತಿಯು ಕೃತಿಚೌರ್ಯವೆಂಬುದು ತಿಳಿದುಬಂದರೆ ಅದಕ್ಕೆ ಸಂಪೂರ್ಣ ಜವಾಬ್ದಾರಿ ಸಾಹಿತಿಗಳದ್ದೇ ಆಗಿರುತ್ತದೆ.

4. ಪ್ರಕಾಶನದ ತಂಡವೇ ಪುಸ್ತಕದ ಮುಖಪುಟ ಮತ್ತು ಒಳಪುಟಗಳ ವಿನ್ಯಾಸವನ್ನು ಮಾಡುತ್ತದೆ. ಬೇರೆ ಕಲಾವಿದರು ಈ ಕೆಲಸ ನಿರ್ವಹಿಸಲಿ ಎಂದು ಸಾಹಿತಿಗಳು ಕೋರಿಕೆ ಸಲ್ಲಿಸಿದರೆ ಆಯಾ ಕಲಾವಿದರ ಸಂಭಾವನೆಯನ್ನು ಪ್ರಕಾಶಕರು ಭರಿಸುವುದಿಲ್ಲ. ಮತ್ತು ಆ ಕಲಾವಿದರು ಪ್ರಕಾಶನದ ಬ್ರಾಂಡಿಗೆ ಅನುಗುಣವಾಗಿ ವಿನ್ಯಾಸವನ್ನು ಅಂತಿಮ ಮಾಡಲು ಸಿದ್ಧರಿರಬೇಕು. 

5. ಪ್ರಕಾಶನವು ಯಾವುದೇ ಪತ್ರಿಕೆಗಳಿಗೆ, ವ್ಯಕ್ತಿಗಳಿಗೆ, ನಿಯತಕಾಲಿಕೆಗಳಿಗೆ ವಿಮರ್ಶೆಗೆ ಎಂದು ಪ್ರತಿಗಳನ್ನು ಕಳುಹಿಸುವುದಿಲ್ಲ. ಜೊತೆಗೆ, ಯಾವುದೇ ಪ್ರಶಸ್ತಿಗಳಿಗೆ ಪ್ರತಿಗಳನ್ನು ಸಲ್ಲಿಸುವುದಿಲ್ಲ. ಮತ್ತು ಪುಸ್ತಕ ಬಿಡುಗಡೆ ಅಥವಾ ಲೋಕಾರ್ಪಣೆ ಸಮಾರಂಭ ಏರ್ಪಡಿಸುವುದಿಲ್ಲ. ಈ ನಿಟ್ಟಿನಲ್ಲಿ ಯಾವುದೇ ರೀತಿಯ ಆರ್ಥಿಕ ಮತ್ತು ಇನ್ನಿತರ ಸಹಾಯವನ್ನು ಮಾಡುವುದಿಲ್ಲ.

6. ಸಾಹಿತಿಗಳು ತಮಗೆ ಅಗತ್ಯವಿದ್ದರೆ ಪುಸ್ತಕದ ಎಷ್ಟು ಪ್ರತಿಗಳನ್ನು ಬೇಕಾದರೂ ಕೊಳ್ಳಬಹುದು. ಈ ರೀತಿ ಖರೀದಿಸುವ ಪುಸ್ತಕಗಳಿಗೆ ಶೇ. 33ರಷ್ಟು ರಿಯಾಯಿತಿಯನ್ನು ಪ್ರಕಾಶನ ನೀಡುತ್ತದೆ. ಈ ಪ್ರತಿಗಳ ಸಾಗಾಣಿಕೆ ವೆಚ್ಚ ಸಾಹಿತಿಗಳದೇ ಆಗಿರುತ್ತದೆ. ಎಷ್ಟು ಪ್ರತಿಗಳು ಬೇಕು ಎಂಬುದನ್ನು ಪ್ರಕಟಣೆಯ ಸಂದರ್ಭದಲ್ಲಿಯೇ ತಿಳಿಸಬೇಕು.

7. ಪುಸ್ತಕವನ್ನು ಅಂತಿಮವಾಗಿ ಸಲ್ಲಿಸುವಾಗ ಎಂಎಸ್‍ವರ್ಡಿನ ಒಂದೇ ಫೈಲಿನಲ್ಲಿ ನುಡಿ ಫಾಂಟಿನಲ್ಲಿ ಯಾವುದೇ ತಪ್ಪುಗಳಿಲ್ಲದೆ ಟೈಪಿಸಿ ಕಳಿಸಬೇಕು. ತಪ್ಪುಗಳಿರುವ ಫೈಲನ್ನು,  ಯೂನಿಕೋಡ್ ಬಳಸಿರುವ ಫೈಲನ್ನು ಪರಿಗಣಿಸಲಾಗುವುದಿಲ್ಲ. ಅಂತಿಮ ಪ್ರೂಫ್‍ರೀಡ್ ಸಾಹಿತಿಗಳದ್ದೇ ಆಗಿರುತ್ತದೆ. ಪುಸ್ತಕಗಳಿಗೆ ಅಗತ್ಯವಿರುವ ಮುನ್ನುಡಿ-ಬೆನ್ನುಡಿಯನ್ನು ಸಾಹಿತಿಗಳೇ ಬರೆಸಿಕೊಡಬೇಕು. ಇಬ್ಬರಿಗಿಂತ ಹೆಚ್ಚು ಜನ ಪುಸ್ತಕ ಕುರಿತು ಬರೆಯಲು ಅವಕಾಶವಿರುವುದಿಲ್ಲ. ಮತ್ತು ಪುಸ್ತಕದ ಪೇಪರ್‍ಬ್ಯಾಕ್ ಆವೃತ್ತಿ ಮಾತ್ರ ಹೊರತರಲಾಗುತ್ತದೆ.

8. ಯಾವುದೇ ರೀತಿಯ ಮನಸ್ತಾಪಗಳಿಗೆ ಪ್ರಕಾಶನ ಹೊಣೆಯಲ್ಲ. ಈ ಸಂಬಂಧ ಯಾವುದೇ ತಂಟೆ-ತಕರಾರುಗಳು ಎದ್ದರೆ ತುಮಕೂರು ಜಿಲ್ಲೆಯ ನ್ಯಾಯಾಲಯ ವ್ಯಾಪ್ತಿಗೆ ಪ್ರಕಾಶನ ಬರುತ್ತದೆ. 

9. ಸಾಹಿತಿಗಳು ಪ್ರಕಾಶನದ ಜೊತೆ ತಮ್ಮ ಪುಸ್ತಕಗಳನ್ನು ಪ್ರಕಟಿಸಲು ಅಂತಿಮವಾಗಿ ತೀರ್ಮಾನಿಸಿದ ನಂತರ ಪ್ರಕಾಶನದ ಕರಾರಿಗೆ ಸಹಿ ಮಾಡಬೇಕಿರುತ್ತದೆ. ಮತ್ತು ಪ್ರಕಾಶನದ ಜೊತೆ ನಂಬಿಕೆಯಿಂದ, ವಿಶ್ವಾಸದಿಂದ ವ್ಯವಹರಿಸುವ ಮೂಲಕ ತಮ್ಮ ಬೆಳವಣಿಗೆಯ ಜೊತೆ ಪ್ರಕಾಶನದ ಬೆಳವಣಿಗೆಗೂ ಸಹಕರಿಸಬೇಕು. ಪ್ರಕಾಶನದ ಘನತೆ ಮತ್ತು ಗೌಪ್ಯತೆಯನ್ನು ಕಾಪಾಡಲು ಬದ್ಧರಾಗಿರಬೇಕು. ಸಾಹಿತಿಗಳು ಒಪ್ಪಿ ಅಂತಿಮ ಫೈಲ್ ನೀಡಿದ ಮೂರು ತಿಂಗಳ ಒಳಗೆ ಪುಸ್ತಕ ಮಾರುಕಟ್ಟೆಯಲ್ಲಿ ಲಭ್ಯವಿರುತ್ತದೆ.

10. ಕನ್ನಡ ಸಾಹಿತ್ಯ ಮತ್ತು ಪುಸ್ತಕ ಪ್ರಕಾಶನದ ಬೆಳವಣಿಗೆಗೆ ಪ್ರಕಾಶನ ಬದ್ಧವಾಗಿರುತ್ತದೆ.

- ಗುಬ್ಬಚ್ಚಿ ಸತೀಶ್‌, ಸಂಪಾದಕರು, 

ಗೋಮಿನಿ ಪ್ರಕಾಶನ, ತುಮಕೂರು. 

(ವಾಟ್ಸಪ್‌ ಮಾತ್ರ @ 9986692342)

ಆತ್ಮವಿಶ್ವಾಸವೆಂಬ ಗಣಿಯ ಧಣಿಗಳಾಗಿರಿ

 ಆತ್ಮವಿಶ್ವಾಸವೆಂಬ ಗಣಿಯ ಧಣಿಗಳಾಗಿರಿ

“ಯಶಸ್ಸಿಗೆ ಮುಖ್ಯ ಕೀಲಿಕೈ ಆತ್ಮವಿಶ್ವಾಸ,

ಆತ್ಮವಿಶ್ವಾಸಕ್ಕೆ ಮುಖ್ಯ ಕೀಲಿಕೈ ಪೂರ್ವಸಿದ್ಧತೆ”

- ಆರ್ಥರ್ ಹ್ಯಾಷ್, ಖ್ಯಾತ ಟೆನಿಸ್ ಆಟಗಾರ

ಸರ್, ನನಗೆ ಎಲ್ಲಾ ಇದೆ. ಆದರೆ, ಈ ಕೆಲಸದಲ್ಲಿ ಸಫಲನಾಗುತ್ತೇನೋ ಇಲ್ಲವೋ ಎಂಬ ಆತಂಕ. ವಿಶ್ವಾಸವೆ ಇಲ್ಲವಾಗಿದೆ ಸರ್ ಎಂಬುವ ಅನೇಕರನ್ನು ನಾನು ನೋಡಿದ್ದೇನೆ. ಅವರಿಗೆ ನಾನು ಹೇಳುವುದು ಒಂದೇ ಮಾತು: “ನಿಮ್ಮ ಮೇಲೆ ನೀವು ವಿಶ್ವಾಸ ಇಡದೆ, ಮತ್ತಿನ್ಯಾರು ಇಡಬೇಕು?” ಎಂದು. ನಿಮ್ಮ ಮೇಲೆ ನೀವು ವಿಶ್ವಾಸ ಇಟ್ಟು, ಸಂಪೂರ್ಣವಾಗಿ ನಿಮ್ಮ ಮನಸ್ಸನ್ನು ನಿಮ್ಮ ಗುರಿಯೆಡೆಗೆ ನೆಟ್ಟು ಕೆಲಸ ಮಾಡಿದರೆ, ನೀವು ಗೆದ್ದೇ ಗೆಲ್ಲುತ್ತೀರಿ. ನಿಮ್ಮ ಆತ್ಮವಿಶ್ವಾಸ ನಿಮ್ಮ ಕೈಯಲ್ಲೇ, ನಿಮ್ಮ ಮನಸಲ್ಲೇ ಇದೆ. ಅದನ್ನು ಎಂದಿಗೂ ಮರೆಯದಿರಿ.

ತನ್ನ ಒಂದೇ ಕಾಲಿನಲ್ಲಿ ಎವರೆಸ್ಟ್ ಏರಿದ ಅರುಣಿಮಾ ಸಿನ್ಹ ಬಗ್ಗೆ ನಿಮಗೆ ಗೊತ್ತಿಲ್ಲದಿರಬಹುದು. ಆಕೆ ಅದೆಷ್ಟು ಆತ್ಮವಿಶ್ವಾಸಿಯೆಂದರೆ, ತನ್ನ ಒಂದು ಕಾಲು ಸಂಪೂರ್ಣವಾಗಿ ಇಲ್ಲದಿದ್ದರೂ ಎವರೆಸ್ಟ್ ಏರಿ, ಆತ್ಮವಿಶ್ವಾಸವಿದ್ದರೆ ಏನನ್ನು ಬೇಕಾದರೂ ಸಾಧಿಸಬಹುದೆಂಬುದಕ್ಕೆ ಉತ್ತಮ ಉದಾಹರಣೆಯಾಗಿದ್ದಾರೆ.

ನಮ್ಮ ದೇಶದ ರಾಷ್ಟ್ರೀಯ ವಾಲಿಬಾಲ್ ತಂಡದ ಆಟಗಾರ್ತಿಯಾಗಿದ್ದ ಅರುಣಿಮಾ ಸಿನ್ಹ ೨೦೧೧ನೇ ಇಸವಿಯ ಏಪ್ರಿಲ್ ಹನ್ನೊಂದರ ಮಧ್ಯರಾತ್ರಿ ಲಕ್ನೋ-ದೆಹಲಿ ನಡುವೆ ರೈಲಿನಲ್ಲಿ ಪ್ರಯಾಣಿಸುತ್ತಿದ್ದಾಗ, ಈಕೆಯ ಕೊರಳಲ್ಲಿದ್ದ ಚಿನ್ನದ ಸರವನ್ನು ಕಳ್ಳರು ಕಿತ್ತುಕೊಳ್ಳಲು ಪ್ರಯತ್ನಿಸಿದ್ದಾರೆ. ಆಗ ಆಕೆ ಇವರನ್ನು ತಡೆಯಲು ಪ್ರಯತ್ನ ಪಟ್ಟಿದ್ದಾಳೆ. ಆಗ ವಿಫಲರಾದ ಕಳ್ಳರು ಆಕೆಯನ್ನು ರೈಲಿನಿಂದಲೇ ಹೊರ ನೂಕಿದ್ದಾರೆ. ಆಗ ಆಕೆ ಎರಡು ರೈಲ್ವೇ ಹಳಿಗಳ ನಡುವೆ ಬಿದ್ದಿದ್ದಾಳೆ. ಆಕೆಯ ಎರಡೂ ಕೈಗಳೂ ಗಾಯಗೊಂಡರೆ, ಬಲಗಾಲಿನ ಮೂಳೆಗಳೆಲ್ಲಾ ಪುಡಿಪುಡಿಯಾಗಿವೆ. ಬೆನ್ನೆಲುಬಿಗೆ ಪೆಟ್ಟಾಗಿದೆ. ಎಡಗಾಲಿನ ಮೇಲೆ ರೈಲೊಂದು ಹರಿದು ಹೋಗಿದೆ. ತೀವ್ರ ರಕ್ತಸ್ರಾವವಾಗುತ್ತಿದ್ದರೂ ಆಕೆ ಬೆಳಿಗ್ಗೆ ಆಗುವವರಿಗೂ ಸುಮಾರು ಏಳು ಗಂಟೆಗಳ ಕಾಲ ಎರಡೂ ಹಳಿಗಳ ಮೇಲೆ ಆಗಾಗ ಬರುತ್ತಲೇ ಇದ್ದ ರೈಲುಗಳಿಂದ ತನ್ನನ್ನು ತಾನು ರಕ್ಷಿಸಿಕೊಳ್ಳಲು ಹೆಣಗಿದ್ದಾಳೆ. ಬೆಳಿಗ್ಗೆ ಹಳ್ಳಿಯವನ್ನೊಬ್ಬ ಈಕೆಯನ್ನು ನೋಡಿ ಆಸ್ಪತ್ರ‍್ರೆಗೆ ಸೇರಿಸುವ ಕೆಲಸ ಮಾಡಿದ್ದಾನೆ. ಆಸ್ಪತ್ರೆಯಿಂದ ಆಸ್ಪತ್ರೆಗೆ ಆಕೆಯನ್ನು ಸಾಗಿಸಲಾಗಿದೆ. ಆಸ್ಪತ್ರೆಯೊಂದರಲ್ಲಿ ಆಕೆಗೆ ಜ್ಞಾನ ಚೆನ್ನಾಗಿ ಇರುವಾಗಲೇ ಅರೆವಳಿಕೆ ಔಷಧಿಯನ್ನು ನೀಡದೆ ಎಡಗಾಲನ್ನು ಕತ್ತರಿಸಿದ್ದಾರೆ. ಆ ನೋವನ್ನು ಆಕೆ ತಡೆದುಕೊಂಡಿದ್ದಾಳೆ. ಕಡೆಗೆ ದೆಹಲಿಯ ಆಲ್ ಇಂಡಿಯಾ ಇನ್ಸಿಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸ್ನಲ್ಲಿ ಈಕೆಗೆ ಸೂಕ್ತ ಚಿಕಿತ್ಸೆ ದೊರೆತಿದೆ. ಅಲ್ಲಿ ಆಕೆಯ ಗಾಯಗಳೆಲ್ಲಾ ವಾಸಿಯಾದ ಮೇಲೆ ಕೃತಕ ಕಾಲನ್ನು ಅಳವಡಿಸಿದ್ದಾರೆ. ಅಲ್ಲಿಗೆ ಆಕೆಯ ಕ್ರೀಡಾ ಜೀವನ ಮುಗಿಯಿತು ಎಂದು ಸಮಾಜ ಅಂದುಕೊಳ್ಳುವಷ್ಟರಲ್ಲಿ ಆಕೆ ೨೦೧೩ರ ಮೇ ೨೧ರಂದು ಎವರೆಸ್ಟ್ ಶಿಖರವನ್ನು ಏರಿ ಅಚ್ಚರಿ ಮೂಡಿಸಿದ್ದಾಳೆ. ಎವರೆಸ್ಟ್ ಏರಿದ ಮೊದಲ ವಿಶೇಷ ಚೇತನ ಮಹಿಳೆ ಎಂಬ ಖ್ಯಾತಿಯನ್ನು ತನ್ನದಾಗಿಸಿಕೊಂಡಿದ್ದಾಳೆ. ತನ್ನ ಮನೋಬಲದಿಂದ ಇತಿಹಾಸವನ್ನು ಬರೆದಿದ್ದಾಳೆ.

ಇಷ್ಟೆಲ್ಲ ಹೇಗೆ ಸಾಧ್ಯವಾಯಿತು ಎಂದುಕೊಂಡರೆ, ಆತ್ಮವಿಶ್ವಾಸ! ಹೌದು, ಆಕೆಯ ಅಪರಿಮಿತ ಆತ್ಮವಿಶ್ವಾಸ. “ನಾನು ನನ್ನ ನೋವನ್ನು ಅವಕಾಶವನ್ನಾಗಿಸಿದೆ. ನಾನು ನನ್ನ ಮನಸ್ಸನ್ನು ಬದಲಿಸದೇ ಇದ್ದಲ್ಲಿ, ಮನೆಯ ಕೋಣೆಯಿಂದ ಹೊರಗಡೆಯೂ ಬರಲಾಗುತ್ತಿರಲಿಲ್ಲ” ಎನ್ನುವ ಆಕೆಯ ಆತ್ಮವಿಶ್ವಾಸದ ಮಾತುಗಳೇ ಆಕೆ ತನ್ನ ಮೇಲೆ ತಾನು ಇಟ್ಟುಕೊಂಡಿರುವ ವಿಶ್ವಾಸದ ಪ್ರಮಾಣವನ್ನು ತಿಳಿಸುತ್ತದೆ. ಎಲ್ಲ ಸರಿಯಿದ್ದವರೇ ಸಾಧಿಸಲಾಗದ್ದನ್ನು ಆಕೆ ಸಾಧಿಸಿದ್ದಾಳೆ. ತಾನೆಂದೂ ಕನಿಕರವನ್ನು ಬಯಸುತ್ತಾ ಬದುಕಬಾರದೆಂದು ಆಕೆ ದೃಢನಿಶ್ಚಯ ತಳೆದಿದ್ದಾಳೆ. ಕಾಲಿನ ಜೊತೆ ತನ್ನೆಲ್ಲಾ ಸರ್ಟಿಫಿಕೇಟ್‌ಗಳನ್ನು ಕಳೆದುಕೊಂಡಿದ್ದ ಆಕೆಗೆ ತಾನೊಬ್ಬಳು ದೇಶವನ್ನು ಪ್ರತಿನಿಧಿಸಿದ ಕ್ರೀಡಾಪಟು ಎಂಬುದನ್ನು ಸಾಬೀತು ಪಡಿಸಲು ಕಷ್ಟವಾಗಿದೆ. ಆಗೆಲ್ಲಾ ಸಾಕಷ್ಟು ಅವಮಾನಗಳಾಗಿವೆ. ಆದರೂ ಆಕೆ ತನ್ನ ಕೃತಕ ಕಾಲಿನ ಸಹಾಯದಿಂದಲೇ ಸುಮಾರು ಎರಡು ವರ್ಷಗಳ ಕಾಲ ನಡೆದಾಡುವುದನ್ನು ಅಭ್ಯಾಸ ಮಾಡಿದ್ದಾಳೆ. ಆ ನಂತರ ಉತ್ತರಕಾಂಡದಲ್ಲಿ ಸಣ್ಣಪುಟ್ಟ ಬೆಟ್ಟಗುಡ್ಡಗಳನ್ನು ಎವರೆಸ್ಟ್ ಏರಿದ ಭಾರತದ ಮೊದಲ ಮಹಿಳೆ ಬಚೇಂದ್ರಿ ಪಾಲ್‌ರವರ ಮಾರ್ಗದರ್ಶನದಲ್ಲಿ ಹತ್ತಿಳಿದಿದ್ದಾಳೆ. ಆ ನಂತರ ಏವರೆಸ್ಟ್ ಏರಿ ಅಪ್ರತಿಮವಾದುದನ್ನು ಸಾಧಿಸಿದ್ದಾಳೆ. ತನ್ನ ಕಷ್ಟದ ದಿನಗಳಲ್ಲಿಯೇ ಅಪ್ರತಿಮವಾದ ಏನನ್ನಾದರೂ ಸಾಧಿಸಿಬೇಕೆಂದು ಕನಸು ಕಂಡಿದ್ದ ಆಕೆಗೆ ಮೊದಲೆಲ್ಲಾ ಇದೆಲ್ಲಾ ಒಂದು ಹುಚ್ಚು ಎನಿಸಿದ್ದಿದೆ. ಆದರೂ ಛಲಬಿಡದೆ ಪ್ರತಿಯೊಂದು ಹೆಜ್ಜೆ ಇಡುವಾಗಲು ತನ್ನ ಭವ್ಯ ಕನಸನ್ನು ಕಣ್ಮುಂದೆ ಕಲ್ಪಿಸಿಕೊಂಡೇ ಹೆಜ್ಜೆ ಇಟ್ಟಿದ್ದಾಳೆ. ಪೂರ್ವಸಿದ್ಧತೆಯ ಪ್ರತಿ ವಿಶ್ವಾಸದ ಹೆಜ್ಜೆಯೂ ಆಕೆಯ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ. ಇಂದು ಆಕೆಯ ಧೃಡ ಆತ್ಮವಿಶ್ವಾಸ ವಿಶ್ವಕ್ಕೇ ಮಾದರಿಯಾಗಿದೆ.

ಆಕೆಯ ಆ ಅಪರಿಮಿತ, ಅಗಣಿತ, ಅಪ್ರತಿಮ ಆತ್ಮವಿಶ್ವಾಸವನ್ನು ನಿಮ್ಮದಾಗಿಸಿಕೊಳ್ಳಿ. ಆ ಮೂಲಕ ಆತ್ಮವಿಶ್ವಾಸವೆಂಬ ಗಣಿಯ ಧಣಿಗಳಾಗಿರಿ. 

ಆತ್ಮವಿಶ್ವಾಸದಿಂದ ಜಯಿಸೋದು ಹೇಗೆ ಎಂಬುದಕ್ಕೆ ಉತ್ತಮ ಉದಾಹರಣೆ ಅಮೆರಿಕದ ಅಧ್ಯಕ್ಷರಾಗಿದ್ದ ಅಬ್ರಹಾಂ ಲಿಂಕನ್! ಹೌದು. ಅಮೆರಿಕದ ಅಧ್ಯಕ್ಷರಾಗಿದ್ದ ಅಬ್ರಹಾಂ ಲಿಂಕನ್ ಅವರು ತಮ್ಮ ಬದುಕಿನಲ್ಲಿ ಎದುರಿಸಿದ ಸೋಲುಗಳು ಅಪಾರ! ಇಪ್ಪತ್ತೇಳನೆಯ ವಯಸ್ಸಿನಲ್ಲಿ ಅವರ ದೇಹದ ನರಮಂಡಲವೇ ತೊಂದರೆಗೊಳಗಾಯಿತು. ನಲವತ್ತಾರನೆಯ ವಯಸ್ಸಿನಲ್ಲಿ ಸೆನೆಟರ್ ಚುನಾವಣೆಯಲ್ಲಿ  ಸೋಲುಂಡರು.  ನಲವತ್ತೇಳನೆಯ ವಯಸ್ಸಿನಲ್ಲಿ ಉಪರಾಷ್ಟ್ರಪತಿ ಚುನಾವಣೆಯಲ್ಲಿ ಅವರಿಗೆ ಸೋಲಾಯಿತು.  ಹೀಗೆಲ್ಲ ಸೋಲುಗಳು ದಿಕ್ಕೆಡಿಸಿದರೂ ಅವರ ಆತ್ಮವಿಶ್ವಾಸಕ್ಕೆ ಸ್ವಲ್ಪವೂ ಧಕ್ಕೆ ಬರಲಿಲ್ಲ. ಐವತ್ತೆರಡನೆಯ ವಯಸ್ಸಿನಲ್ಲಿ ಅವರು ಅಮೆರಿಕದ ಅಧ್ಯಕ್ಷರಾದರು. 

ಈ ನಿಟ್ಟಿನಲ್ಲಿ ಸ್ಕಾಟ್ಲೆಂಡ್ ದೊರೆ ರಾಬರ್ಟ್ ಬ್ರೂಸ್ ಮತ್ತು ಜೇಡದ ಕಥೆ ಬಹಳ ಮುಖ್ಯವಾದದ್ದು. ರಾಬರ್ಟ್ ಬ್ರೂಸ್ ಸ್ಕಾಟ್ಲೆಂಡ್ ಅನ್ನು ೧೩೦೬ ರಿಂದ ೧೩೨೯ ರವರೆಗೆ ಆಳಿದರು. ಅವರು ಶ್ರೇಷ್ಠ ದೊರೆಗಳಲ್ಲಿ ಒಬ್ಬರಾಗಿದ್ದರು, ಇಂಗ್ಲೇಂಡ್ ವಿರುದ್ಧದ ಸ್ವಾತಂತ್ರ‍್ಯದ ಯುದ್ಧದಲ್ಲಿ ಸೋಲಿನ ನಂತರ ಒಂದು ಗುಹೆಯನ್ನು ಸೇರಿಕೊಂಡರಂತೆ. ಅಲ್ಲಿ ಚಿಂತಿತರಾಗಿರುವಾಗ ಜೇಡವೊಂದು ತನ್ನ ಬಲೆಯನ್ನು ನೇಯ್ಗೆ ಮಾಡಲು ಪ್ರಯತ್ನಿಸುತ್ತಿರುವುದನ್ನು ಬಹಳ ಸಮಯದಿಂದ ನೋಡುತ್ತಿದ್ದರಂತೆ. ಆರು ಬಾರಿ ಜೇಡದ ಪ್ರಯತ್ನಗಳು ವಿಫಲವಾದರೂ ಕೂಡ ಅಂತಿಮವಾಗಿ ಜೇಡ ತನ್ನ ಛಲಬಿಡದೆ ಆತ್ಮವಿಶ್ವಾಸದಿಂದ ತನ್ನ ಕೆಸಲದಲ್ಲಿ ಜಯ ಸಾಧಿಸಿತಂತೆ. ಇದರಿಂದ ಪ್ರೇರಿತರಾದ ಇವರು ಮುಂದೆ ಇಂಗ್ಲಿಷರೊಂದಿಗೆ ಯುದ್ಧವನ್ನು ಗೆದ್ದರು ಎಂಬುದು ಕೂಡ ಒಂದು ದಂತಕತೆಯೇ ಆಗಿದೆ.‌

ಅಪರಿಮಿತ ಆತ್ಮವಿಶ್ವಾಸ ನಿಮ್ಮದಾಗಲಿ...

- ಗುಬ್ಬಚ್ಚಿ ಸತೀಶ್.